كيف تتكون الجزر؟

طبعا أنا هنا بتكلم عن الجزر اللى هى جمع جزيره مش جزر اللى بياكله الأرنب

طبعا لأن جزر فى النحو كلمه جمع اما جزر اللى بياكله الأرنب مفرد وبعدين بقى واحد بنلاقيه مرفوع بالكسره و....

إيه اللى أنا بقوله ده ؟

ندخل جد بقى فى الجد

الجزيره طبعا فيه ناس كتيره مفكره إنها بتكون مجرد مكان متكون فوق البحر كده وخلاص

إنما الجزيره بتتكون من خلال تلات طرق

١- من خلال مخلوقات اسمها ال Polyps
وال polyps مخلوقات قريبة من قنديل البحر لكن بتعيش في مستعمرات. ولان ال polyps اجسامها لينة ومعرضة للخطر بسهولة، فبتلجأ المخلوقات دي لبناء ما يحيط باجسامهم لحمايتها، وبيستخدموا ال limestone او حجر الكلس.
وبالتدريج، المستعمرة بتكبر وبتكون شعب مرجانية، اللي ممكن تمتد الى مئات الاميال.
طبعا الشعب المرجانية بتتكون تحت سطح البحر. امال ازاي بتساهم في تكوين جزر؟
دة بيحصل في حالة انخفاض سطح البحر فالشعب المرجانية بدل ما كانت تحت البحر بتطلع دلوقتي وتطفو على السطح.
والبتدريج، الغبار من الريح والرمل اللي بيكون في البحر بيتراكموا وتتكون جزيرة.

2-ارتفاع مستوى الماء ودة حصل مع انتهاء العصر الثلجي. دة لان في العصر الثلجي، ماء الارض كان محبوس في صورة ثلج عند القطبين وكانت المحيطات ضحلة عن دلوقتي. فمع نهاية العصر الثلجي، التلج ساح سهلة يعني فدة ادى الى ان بعض الاراضي اللي كانت متصلة ببعض تتحول الى جزر لان الماء من التلج اللي داب حوطها وقطعها عن الاراضي اللي كانت متصلة بها.
ودة على فكرة الطريقة اللي نيوزيلاندا اتعزلت بها عن استراليا.

3-عن طريق البراكين من خلال ما يسمى بال hotspots
وال hotspot اماكن تتميز بالحرارة الشديدة تقع تحت الالواح او ال tectonic plates اللي ذكرناهم قبل كدة.
دلوقتي احنا قلنا ان الالواح التكتونية في حالة حركة دائمة. فلما يعدوا من فوق Hotspot, دة بيؤدي الى انصهار اللوح. فاللوح لما ينصهر دة بيؤدي لظهور حمم بركانية (magma). طبعا بما ان ال magma اقل كثافة من الصخور الصلبة المحيطة بها، بتقوم طالعة فوقها وتخترق قشرة الارض وارض البحر.
مع تكرار العملية دي، كل مرة ال magma تتكوم فوق بعضها في ارض البحر لحددد ما تظهر قطعة ارض في نص البحر ويكون عندنا جزيرة
وهاواي مثلا تكونت بالطريقة دي..

معلش الخط ولونه غير مناسب